ချစ်သူ

အခုဆိုရင်  
ရာသီဥတုတစ်ခုစာမက ငါတို့ ဖြတ်သန်းကြရတော့မယ်  
ဖျားနာခြင်းကင်းတဲ့ အချစ်မှာ ဖျားနာဖို့  
ဘဝကို သက်တံဖျော်ရည်တိုက်ဖို့  
ငါတို့အတွက် မလိုအပ်ဘူး  
ဒါပေမယ့်  
ချစ်ခြင်းတရားရဲ့ ကြီးမြတ်လှတဲ့ ကျေးဇူးတော်မှာ  
ငါတို့ ညွှတ်နူးကြရဲ့  
ငါတို့ရဲ့ ယုံကြည်မှုတွေဟာ ငွေ့ရေဖွဲ့ထားတဲ့ တိမ်တစ်အုပ်လည်း မဟုတ်ပေဘူး

ရူးသွပ်မှုဆိုတာ ငါတို့နှစ်ယောက်ကြားမှာတော့ ရယ်စရာသက်သက်  
အနာဂတ်ကို ခက်ခက်ခဲခဲမတွေးခေါ်ဘဲ  
မင်းလျှောက်ချင်တဲ့ခရီးကို ငါ့ခြေထောက်နဲ့ လျှောက်ပြီး  
ငါကြည့်ချင်တဲ့ အလှအပတရားကို မင်းနှလုံးသားနဲ့ကြည့်ကြဖို့  
ငါတို့ မျှော်လင့်  
ရှေ့တစ်လျှောက်  
ငါတို့ စမ်းချောင်းလေးလို စီးဆင်ကြစို့ …။ ။