မိုးတွေလေ … စိုပေ့စေ

မိုးတွေလေ  
ရွာချကုန်ပြီ  
စိုပေ့စေ … ငါတို့ စိတ်အေးလက်အေး ဆက်လျှောက်ကြမယ်

မိုးတွေလေ သည်းလိုက်ပုံက  
ဒဏ်ရာတွေတောင် နက်ဝင်သွား  
သွေးမတိတ်တေးနဲ့ မြှားတွေလို စိုက်ဝင်လာ မိုးစက်များ  
အနီရောင်ရင်ဘတ်နဲ့ခံယူပါ့မယ်  
မျက်ရည်တိတ်တေးအဖြစ်ပြောင်းသွားတဲ့အထိပေါ့

မိုးတွေလေ ရက်စက်တဲ့ အမှောင်တွေ သွန်းချ  
စည်းပျက်ဝါးပျက်လမ်းတွေ တအိအိ ပိကျလာ  
မကြောက်လေနဲ့  
သန်မာတဲ့ငါတို့ခြေထောက်တွေနဲ့ လဲမကျအောင်တွန်းလှန်  
ရုန်းကန်ရလေလေ ငါတို့ခြေရာတွေ နက်လေလေပဲ မဟုတ်လား

မိုးတွေလေ လောကဓံ  
ရွာနှင့်လေဦး  
စိုပေ့စေဦးပေါ့

ခြေလမ်းတိုင်း အဓိပ္ပာယ်ရှိစွာ  
ယုံကြည်ခြင်းတရားအတွက် ငါတို့ ရွဲရွဲအစိုခံတယ်  
မိုးတွေလေ … စိုပေ့စေ  
ငါတို့ ယုံယုံကြည်ကြည် ဆက်လျှောက်ခဲ့ကြတယ်