လူလိမ္မာမိုက်

ကိလေသာအညစ်အကြေးတွေအခိုင်အမာ အမြစ်တွယ်နေတဲ့  
အရိုးပေါ်အသားတင် တန်ဆာပလာနဲနဲထည့်ပြီး အရေပြားစွပ်ထားတဲ့ ဝတ္ထုအစုအပုံကြီးပေါ့

ခံစားစိတ်ကလေးက ပါးလျလှုပ်ခတ်လွန်းတော့ သူ့ခမျာ မနေနိုင်မထိုင်နိုင် ကဗျာတွေရေး

သူ့စွဲလမ်းစိတ်ကိုသူ ကျားကုတ်ကျားခဲ ဖက်တွယ်ထားပုံက ကြေးမုံမှန်တစ်ချပ်လိုပဲ  
ကြည့်ဦးလေ  
သူက ကမ္ဘာကြီးကို ရွံချစ် ပါသတဲ့  
သူက သဘာဝတရားကြီးကို ရွံချစ် ပါသတဲ့  
အလှတရားကို ရွံချစ် ပါသတဲ့  
ပြီးတော့  
လူတွေ …  
အတ္တ ပုံစံအမျိုးမျိုး …  
ခေတ် … အစရှိသဖြင့်ပေါ့လေ  
နောက်ဆုံး … သူ့ကိုယ်သူ  
ရွံချစ် … ရွံချစ် …. ရွံချစ် ပါသတဲ့ …

မေတ္တာ ကရုဏာ ကာမဂုဏ်စွဲလမ်းမှု  
တရားမှန်နဲနဲ တရားမှားများများ လက်ကိုင်ထားတယ်

သူ့ခေါင်းမာမှုက သံခမောက်  
သူ့စိတ်ထားက ပိုးစဖြူ ပါးပါးလေး

သူ့မှာမရှိတဲ့ နောင်တနဲ့ သူ့ဘာသာသူ ပြန်ပြန်ပစ်  
သူ့မာနတွေ တလူလူလွင့်ပေါ့

အဲဒါ … တရားစစ်မရနိုင်တဲ့ ဆန့်ကျင်ဘက်တွေနဲ့ လူပုဂ္ဂိုလ်ကြီး  
ကဗျာဆရာပေါ့ …။ ။