လူပျင်းစကား

ဘဝနဲ့ လွဲနေတာတော့ ကြာပြီ အဖေ  
ပျင်းပျင်းရှိတိုင်း အုန်းလွဲအောင် အိပ်တတ်သူကျွန်တော်လေ  
ကြာတော့ လူကိုယ်တိုင်က နှစ်ဆယ်သုံးနှစ်ပိုင်းတစ်ပိုင်း တိမ်းစောင်းခဲ့

အမြင်တွေမှားနေတာလား၊ အမှားတွေ မြင်နေတာလား  
ဘယ်ဒင်းက ပိုမှန်မလဲ  
အဖြေမရှိဘူးအဖေ၊ ကျွန်တော်က လူပျင်းပါ  
ပျင်းလို့ ဘာမှ မပြောပဲ အပြင်ထွက်ထိုင်နေတာ ကြာပြီပဲ

အဖေ အားမလိုအားမရဖြစ်ချင်လည်း ဖြစ်စရာ ကျွန်တော်ပါ  
ဘာတစ်ခုမှ ပြီးအောင်မလုပ်ခဲ့သူ ကျွန်တော်ပါ  
အသုံးမကျတဲ့စကားလုံးတွေနဲ့ စကားတွေအများကြီးဖြုန်းတီးခဲ့သူ ကျွန်တော်ပါ  
အခက်ခဲဆုံး ပထမဆုံးခြေလှမ်းကို  
အပျင်းပေါင်းတစ်ထောင်နဲ့ ပေပေတေတေ ကျွန်တော်ငြင်းဆန်ခဲ့ပေါ့  
အဖေသာ အနားမှာရှိရင် အဆော်ခံထိမှာ အသေအချာ

ဖေဖေရေ…  
သိပ်လှတဲ့ နွေဦးလေးတစ်ခုလောက်တော့  
ကျွန်တော်တို့ ပိုင်ဆိုင်လိုက်ချင်တယ်  
အဲဒါဆိုရင်ပဲ ကျွန်တော်ရဲ့ ပျင်းရိမှုတွေကို ဆေးကြောသန့်စင်ပြီး  
လုပ်စရာရှိတာတွေ အားကြိုးမာန်တက်လုပ်ပစ်လိုက်ပါ့မယ်  
ခက်နေတာက အဖေရယ်  
နွေဦးကို ဆောင်ကြဉ်းဖို့ ကျွန်တော်က ပျံလွှားငှက်မဟုတ်ခဲ့ပါဘူး  
ကံဆိုးတွေ မိုးမှောင်ကျဆဲ…။ ။