ဝံပုလွေများ

ကမ္ဘာမြေကြီးပေါ်ကို ရောက်လာကတည်းက  
လက်သီးကျစ်ကျစ်ပါအောင်ဆုပ်လို့  
မကျေနပ်နိုင်တဲ့ ဆာလောင်မွတ်သိပ်မှုနဲ့  
သူတို့ … လောကကြီးကိုတစ်ချက်ဝေ့ကြည့်တယ်

ဒီလိုနဲ့  
သဘာဝတရားရဲ့ သွေးကြောထဲမှာ  
အတ္တတွေပြိုင်ဖို့  
သူတို့ တက်တက်ကြွကြွအသက်ရှူမှန်ကြတော့တယ်

အနည်းဆုံးတော့  
တဖက်လူကို ထိုးနှက်ဖို့  
သူတို့အရေပြားအောက်မှာ  
ကိုယ်ပိုင်အမှန်တရားချွန်ချွန်တစ်ခု ဖွက်ထားကြလိမ့်မယ်

ကောက်ကျစ်မှုအကြောင်းပြောတော့ စကားလုံးတွေ သိပ်လှတာပဲ  
ထောင်ချောက်ပေါင်းမြောက်များစွာ စကားတွေကြား ဖွက်ထားကြတယ်  
ပြုံပြတဲ့အပြုံးမှာ ထက်မြတဲ့ အစွယ်တွေနဲ့

ဟုတ်ကဲ့ … မင်္ဂလာပါခင်ဗျာ …တဲ့။