ဒီဇင်ဘာ ၁၃ / ဒီဇင်ဘာအပိုတွေ
Posted on Dec 6, 2013
လူတိုင်းဆောင်းရာသီကိုနှစ်သက်ကြတာပဲ။
ငါကျမှ ဘာပို ထူးမလဲ
ဒီလို
ထပ်ခါထပ်ခါဒီဇင်ဘာတွေ / ဒီဇင်ဘာအပိုတွေ ညှပ်ညှပ်ထုတ်ပစ်ခဲ့
ဘ၀ရဲ့ စက်လက်မောင်းတွေ ရှည်လျားရာ
မုန်တိုင်းကမ္ဘာမှာ ဒီဇင်ဘာဟာ မပျော်ရွှင်နိုင်တော့ဘူး။
ကြာတော့
အရောင်တွေကလှလိုက်တာဆို အဖြူနဲ့အမည်း
ဒီဇင်ဘာအသစ်စက်စက်တွေလည်း ချက်ချင်းအိုဟောင်းသွား
တားမြစ်တောထဲက ရောင်စုံပန်းသီးတွေလည်း ပုတ်သိုးသွား
ဆွေးမြေ့ဟောင်းနွမ်းလှချည်ရဲ့ ဒီဇင်ဘာ ဆွေးမြေ့ဟောင်းနွမ်းလွန်းလှချည်ရဲ့…
ဆောင်းငိုတော့ နှင်း
ဒီဇင်ဘာငိုတော့ ကဗျာ
ကဗျာတွေ ငိုပြီလား ဒီဇင်ဘာ
(ကဗျာ့မျက်ရည် စာရွက်ပေါ်ကျကောင်းရဲ့လား)
ဘက်ထရီကုန်သွားတော့မယ့် ဒီဇင်ဘာ
နောက်ဆုံးအားလေး ညစ်ထုတ်ပြီး လင်းဖို့ကြိုးစား
လူကြုံပေးလိုက်တဲ့ ဒဏ်ရာတွေတောင် လွှတ်လှလာ
ရေတံခွန်တွေထဲက နှင်းစက်လေးတစ်ပွင့်သာ…
၂၅ နိုဝဘာ ၂၀၁၃ (၁ဝ၄၅ ည)