လွမ်းမိတဲ့မြို့

နေခြည်ဟာ လွမ်းတဲ့စိတ်နဲ့ တို့မြို့လေးပေါ် ခပ်စောစော ဖြာကျလာတယ်
ပြောင်းလဲသွားတဲ့ မြေပုံအနေအထားမှာ
မြေသြဇာကောင်းကောင်းက ရုန်းထွက်လာတဲ့ အထပ်မြင့်အဆောက်အဦးတွေကြား
ကုန်းတွေကို ကျော်တဲ့ တံတားတွေကြား
ဟိုအရင် လျှောက်ခဲ့ဖူးတဲ့လမ်းလေးတွေ ပြန်မရှာတတ်ခဲ့ဘူး

အခုတော့ ဘယ်တော့ ပြန်ရောက်မယ်မှန်း မသိနိုင်တော့တဲ့ မြို့ပေါ့
သေနတ်ဒဏ်ရာ ဗရပွနဲ့ ဘယ်လို ကုစားရမလဲ မြို့လေးရေ...
အနာတွေက သိပ်နက်တယ်နော်
သွေးမှတ်တမ်းမှာ နာမည်တွေ ထပ်ထပ်တိုးလာနေတော့တာပဲ

တစ်ချို့လူတွေအတွက် မြို့လေးက နောက်ဆုံးခံတပ်တဲ့
အရင်က ကြိုက်ခဲ့ဖူးတဲ့ ကဗျာစာသား တကယ့်လက်တွေ့ဖြစ်လာတော့ အိမ်မက်ဆိုးကြီး
ငါကတော့ အဝေးက စာတစ်စောင်ထက် မပိုဘူး
လူသေလက်ထဲက ဓားပဲ
နာကျင်ရပါတယ်

အမေရှိတဲ့ မြို့လေး
တစ်နေ့ ငါပြန်လာမယ့် မြို့လေး
ကမ္ဘာနှစ်ခု စစ်ပွဲကြားမှာ ဓမ္မတေးဆို ပြည်သူတွေ အောင်နိုင်ပါစေ
ပွင့်လင်းရောင်ခြည်တွေ အမှောင်မိုက်ဆုံးထောင့်များထိ လင်းဖြာနိုင်ပါစေ
ငါရှာမတွေ့ခဲ့တဲ့လမ်းတွေ အမြန်ပြန်ရှာနိုင်ပါစေ